政Whats噏：金錢交易恐染疫　謝偉銓促政府加快推電子支付

減少觸碰公共物品係要防範病毒同細菌嘅好辦法，但錢銀嘅接觸在所難免。建築、測量、都市規劃及園境界議員謝偉銓（Tony）促請政府要搵出電子支付係香港未能全面普及嘅原因，聯同金管局廣泛推行電子支付，減低因錢銀接觸造成嘅病毒感染。

Tony指香港作為國際金融中心，雖然都有八達通同信用卡呢啲電子支付方法，金管局都推出咗轉數快支付平台，但到依家為止電子支付仲未全面普及。佢講咗幾個潛在原因，例如商戶每次使用時都要畀一定比例嘅交易費、開設相關帳戶嘅過程複雜、普羅大眾唔放心進行交易同埋唔識用等等。

點先可以令市民願意採用電子支付？Tony建議政府可以招聘一啲年輕人，培訓佢哋，喺做足防疫措施嘅情況下，向唔同嘅街市同小商戶講解，協助佢哋開設轉數快戶口，都可以幫助到場買嘢嘅市民使用。政府又應該帶頭，喺一啲採購、工程或顧問項目用轉數快找數。佢話若再遇上疫情爆發，都可以透過電子支付減少錢銀接觸，唔會阻礙資金流轉，令經濟可以係疫情下都健康增長。