政Whats噏：55%受訪市民對行會成員無認知　學者質疑決策成效

有民調機構今日(22日)發布行政會議非官守議員嘅認知度評分，有55%受訪市民話對行會成員並無認知，噏都噏唔出佢哋個名，而行會召集人陳智思民望仲要創有紀錄以嚟嘅新低添！有學者就話行會作為政府嘅智囊團，竟然認受性咁低，質疑所制訂嘅政策唔符合市民需要。

香港民意研究所喺上月31日至本月4日，成功訪問約1000名市民，發現受訪者最熟悉嘅行會非官守議員係葉劉淑儀，提名率為34%；其次係陳智思，有15%；排第4位係張宇人，但提名度只係錄得單位數。此外，有55%受訪者表示對行會成員並無認知，有11%人就噏錯成員嘅大名。

認知度最低嘅成員包括周松崗，議員劉業強、廖長江同林健鋒。而最為人熟悉嘅行會非官守議員民望都低過50分，當中以葉劉民望最高，有31分；其次係陳智思有29.5分，較上次調查下跌1.6分，創出自2005年有紀錄以嚟嘅新低；而葉國謙、張宇人等只係錄得大約26分。

民研副行政總裁鍾劍華話行會成員，無論係認知度同民望都錄得斷崖式下跌，竟然有超過一半受訪者唔認識一眾成員，當中好多更加只有1%至2%嘅認知度。佢講到行會本應係社會核心組織，作為特首嘅首席顧問，唔少重大決定都要由特首會同行會一同公布，但民調反映社會並唔重視行會，同時唔理解點解某啲人有能力擔任行會成員，亦唔知道佢哋有何作為。

行政會議前身係行政局，鍾劍華回想起當年港督會同行政局出嚟宣布政策係好大件事，大家對行政局成員非常熟悉，佢哋嘅說話相當有權威性，係政府嘅代言人，但真係今時唔同往日喇，佢仲話希望政府可以正視問題，挽回社會信心。

而理工大學應用社會科學系專任導師譚建元亦話行會作為政府嘅智囊團，係政府其中1個最重要嘅決策者，但市民都噏唔出當中嘅成員，質疑整個班子嘅認受性咁低，所制訂嘅政策方針係咪可以真正切合市民需要。佢直言政府做得唔夠，應該要加強行會同市民之間嘅溝通，畀市民了解行會嘅職能，同時認識政策制訂者。