政Whats噏:中秋贈㷫 陳樹英派發霉月餅認衰道歉

20200924
東網電視
更多新聞短片
陳樹英就派發霉月餅致歉。
仲有一個禮拜就到中秋節,唔少議員都會派月餅畀街坊,不過屯門區議會主席陳樹英竟然派發霉月餅畀長者。吓!收到肯定㷫過辣雞喇,仲可能食壞人呀?佢發現有發霉月餅後即刻認衰,今日(24日)喺社交平台為事件致歉。
陳樹英喺社交平台貼文話,辦事處早前喺區內一間餅店購買據稱係自家製嘅「迷你奶黃月」,佢哋喺啱啱過去嘅星期日(20日)收貨,星期一(21日)開始派發畀長者,但係發現有小量發霉,佢懷疑餅店出售過期月餅。
佢隨即就事件向長者致歉,又話辦事處會即時更換質素仍然良好嘅月餅畀街坊外,同時向涉事餅店投訴,仲喺社交平台上載咗畀食環署嘅信件,要求調查涉事餅店所售賣嘅月餅係咪自家製作,兼且要求餅店提供製作日期同建議食用限期。
東網向陳樹英查詢,佢話向嗰間餅店買咗400個月餅,暫時發現有5個月餅發霉,今日會帶同月餅到餅店更換。