政Whats噏:廖長江申報選舉開支使8.3萬 自己埋單2.6萬

20200924
東網電視
更多新聞短片
廖長江申報選舉開支,當中有5萬多港元係選舉捐贈。
立法會換屆選舉原定於今年9月舉行,不過因為疫情而押後,所招致嘅選舉開支將會由政府埋單。近日陸續有唔少參選人提交開支申報,當時已報名競逐連任嘅商界(第二)功能界別嘅廖長江,申報咗約8.3萬港元嘅選舉開支,當中有約5.7萬港元係選舉捐贈,換言之剩返嘅約2.6萬港元就要自己埋單喇!
根據廖長江所提交嘅選舉開支申報,涉及嘅開支包括有聘請選舉助理、交通費、製作宣傳品費用同埋法律服務等等嘅開支。至於有關5.7萬港元嘅選舉捐贈方面,其中有5.2萬港元屬於法律服務,包括就1宗案件嘅諮詢費,另外5千蚊就係辦公室開支。參選人提交開支申報時都要簽署聲明書,並由太平紳士、監誓員、持執業證書嘅律師監誓簽署,廖長江就搵咗同屬「6人組」嘅金融界議員陳振英監誓。
另外,亦有部分功能界別參選人提交開支申報,當中參選法律界嘅大律師公會主席戴啟思就申報2萬多港元,當中2萬港元係用嚟聘請選舉代理人。參選會計界嘅林智遠,就申報約6.9萬港元,當中有3萬多港元係聘請助理,選舉捐贈就有6800幾蚊。參選體育、演藝、文化及出版界嘅李錦添就使咗約5300港元,主要都係使喺設計選舉橫額、買電話卡作宣傳,同埋食飯收集提名。