政Whats噏:區議員查詢全民檢測通函數字 鬧爆香港郵政敷衍作答

20200924
東網電視
更多新聞短片
政府部門互相卸膊、數據又唔公開,低透明度令人難以信服。
政府早前推行全民檢測計劃耗用數億公帑,被各界批評成本效益低,形容計劃係「燒銀紙」。荃灣區議會日前召開大會,要求政府交代計劃當中未明確嘅數據,其中包括向政府查詢,有幾多荃灣區居民收到全民檢測嘅資料單張。點知香港郵政敷衍了事,只係答咗「一批」,激到區議員譚凱邦拍案而起,喺會議上即場撕爛香港郵政嘅回覆文件!
之後我哋向譚凱邦查詢,佢話睇完回覆文件嗰一刻,感到非常氣憤,所以忍唔住將文年撕爛,然後跟手將「廢紙」拎咗去回收。就荃灣區全民檢測嘅安排及檢討,佢話有唔少問題要向政府相關部門作出查詢。然而不單止香港郵政草率作答,其他由公務員事務局代表政府各部門所回答嘅問題,亦都係答非所問,唔知搞邊科咁。
其後我哋再向香港郵政同埋公務員事務局查詢,香港郵政就話已經回答咗荃灣區議會,表示政府八月底已經向全港住宅及商業單位投寄一批資料單張,當中包括荃灣區,冇其他補充。又話若果區議員有其他查詢,都樂意回答喎。而公務員事務局就以電話方式回覆,話郵政署已經回覆咗,局方冇補充。
話說政府推出嘅全民檢測計劃係由公務員事務局全面統籌,為嘅係檢視社區感染情況同埋盡早搵到隱形患者。但實際上,成個計劃政府動用5.3億港元,但只係搵到32個新確診個案,平均每個確診個案花費千幾萬。另外,政府預料會有5百萬名市民參與,點知接受檢測嘅市民最終都只係得百幾萬,搞到負責統籌今次計劃嘅公務員事務局局長聶德權都要搵遮醜布,叫市民唔好討論開支值唔值得。政府理屈詞窮,自然令到市民質疑計劃嘅推廣是否出咗問題。
區議會依家就檢測計劃嘅推廣而發出詢問,想了解當局派咗幾多宣傳單張啫。但點知咁簡單嘅問題,局方都答唔出,而朱曼鈴為首嘅香港郵政又同公務員事務局「互相拋波」,含糊其詞。還是政府唔記得統計資料單張嘅數量,所以先至答唔出呢?真係令人百思不得其解。無論如何,政府部門間互相卸膊、數據又唔公開,透明度咁低又點樣叫人信服呀?