政Whats噏:加入官場改主張 何啟明撐政府拒設失業金

20200925
東網電視
更多新聞短片
何啟明加入政府後,不再堅持爭取設立失業援助金。
成日都話制度內改革唔容易,仲可能隨時畀制度改變返自己。依家跨黨派都倡議政府要設立失業援助金,勞工及福利局副局長何啟明,認同政府話失業金制度不可行嘅立場,同佢過往擔任勞工界議員嘅主張真係好唔同,莫非何啟明真係已經畀政府同化,忘記咗初心?
尋日政府要向立法會財務委員會申請第3輪抗疫基金撥款,所以何啟明都有同一班司局長一齊落議會。對於政府堅決拒絕設立失業金制度,曾積極爭取設立失業金嘅何啟明,竟然都話諒解政府唔做嘅原因,指如果真係設立,本港失業率有可能長期維持喺4%-5%。佢又擔心失業金制度會削弱勞動力市場,對天然資源貧乏嘅香港而言,恐怕會對經濟增長構成不良影響。乍聽之下,不禁令人諗起嗰句歌詞「是我們改變了世界、還是世界改變了我和你」。
咁做唔到失業金,政府又可唔可以再優化吓依家綜援制度下嘅失業支援計劃,畀多啲人成功申請到啊?何啟明就話,勞福局內部都有傾過,但最後都係放棄咗,不過佢就冇透露原因啦。至於仲有乜嘢措施可以幫水深火熱嘅基層市民,佢只係話自己每日都會睇剪報吸收下有乜嘢新建議,話希望大家集思廣益喎。睇嚟何啟明入咗政府之後,好似忘記咗仲可以落區聽民意喎。