政Whats噏：油尖旺用政治圖案作節日燈飾　民政處反對指令人不安

喺18個區議會當中，17個由民主派當道，經常被質疑以政治凌駕民生議題。油尖旺區議會早前通過以政治敏感嘅圖案作為節日燈飾，就被民政事務處反對喇！

油尖旺區議會節日慶典活動統籌委員會早前就節日燈飾申請109萬港元撥款，並通過將網上討論區嘅「連豬」圖案加入設計。之不過民政處以《運用區議會撥款守則》同《油尖旺區議會撥款指引》，引述多個原因反對決定，包括指有關圖案令人不安、唔符合節日氣氛、影響社區和諧、為商業機構作宣傳，亦可能引伸版權問題，話若然區議會堅持執行決定，民政處將拒絕進行招標。

雖然區議會已經「跪低」，同意會修改設計。但提出有關設計建議嘅區議員仍然「死剩把口」，指摘處方嘅行為屬政治審查，覺得有關圖案令人聯想起反修例運動，就用齊所有理由，將一個卡通圖案拒之門外，話政府並無權力裁定圖案係咪會令人不安，將會送交淫審處由處方裁定。有關區議員仲講到為咗令區內仍然有燈飾存在，先迫於無奈讓步，講到好為居民切想咁話喎。