政Whats噏:港台多事之秋 林大輝:恪守《港台約章》否則好易出意外

20200928
東網電視
更多新聞短片
林大輝會後指顧委會和港台目標一致,希望可以把港台愈做愈好。
香港電台近期多個節目惹起爭議,包括《頭條新聞》、《左右紅藍綠》同被批評違反一個中國原則嘅英文節目《The Pulse》等,呢啲節目唔單止收到大批市民投訴偏頗、散布仇恨等,亦畀政府高官點名批評,同埋畀通訊管理局裁定投訴成立,並發出警告指違反廣播條例。上述接連嘅負面事件,都令好多市民對港台節目失望,而負責向港台節目提供畀意見嘅港台顧問委員會,早前宣布會有新一屆委員履新,新任顧委會主席林大輝今日(28日)就正式召開上任後嘅首次會議,佢喺會後強調,顧委會同港台員工都要恪守《港台約章》,否則只會好似唔遵守交通規則一樣,「好易出意外」。咁又係,亂咁衝紅燈好易車毀人亡㗎嘛。
林大輝話,港台近期嘅節目經常畀人投訴,又多次收到通訊局發出嘅警告當然唔係咁好,又指日後顧委會會向港台提出更多具建設性嘅意見,並強調溝通可以解決任何問題,希望任內能減少港台同各界嘅紛爭、分歧與矛盾。之但係,除咗節目爭議之外,近期關於港台助理節目主任利君雅要延長120日試用期嘅事件亦係一大焦點。
事緣港台舊年接獲大量針對利君雅喺出席政府同警方記者會期間嘅表現同行為嘅投訴,而港台亦決定就此重啟調查,利君雅要係尋日5點前回覆是否接受。林大輝被問到點睇呢件事時,就話冇特別意見,不過每個人做嘢都總會有人彈有人讚,覺得「職場上合則來、不合則散」係平常事。佢又話顧委會唔會就個別員工嘅合約安排畀意見,因為人事安排並唔屬於顧委會嘅職責範圍之內。
至於香港電台節目製作人員工會主席趙善恩就話,呢件事極其罕有,相信事件係來自商務及經濟發展局等更高層次嘅壓力,認為今次重啟調查嘅理由,既唔充分亦唔合理。佢又指新一屆顧委會亦要遵守《港台約章》中嘅角色,唔好干預港台前線新聞工作者嘅日常工作。而被指係今次事件中施壓嘅商務及經濟發展局局長邱騰華就話,唔回應假設性問題。邱騰華重申不便評論事件,指今次只係涉及政府部門內公務員升遷安排,而政府有既定機制處理。