政Whats噏：被老屈後不計前嫌　張建宗開腔「氹返」馬逢國

疫情下好多行業都大受打擊，體育、演藝、文化及出版界議員馬逢國早前係記者會上，講到所屬業界近來冇工開嘅慘況時一度哽咽落淚，期間仲因為錯誤引述政務司司長張建宗要冇受資助行業「識大體」，搞到一連兩日公開道歉。去到今日(28日)立法會財委會，兩人冤家路窄，點知期間張建宗就首次開腔「氹返」馬逢國。

馬逢國係會上發言，指早前已經向政府反映業界嘅困難，但政府若非一副愛莫能助嘅面孔，就係愛理不理嘅態度。佢又指之前畀過21點建議政府，但政府就淨係回應咗3至4項。佢話如果政府唔係冷待對佢，佢願意幫助政府識別業界需要資助嘅人。

而張建宗回應時就話，馬逢國嘅努力佢好欣賞，更指如果馬逢國提供嘅資料有根有據，識別機制能夠操作，張願意為馬逢國奔走咁話。