政Whats噏︰陳日君赴羅馬食檸檬　不獲教宗接見

天主教香港教區主教楊鳴章自去年1月病逝，主教一位出缺近2年，接任人誰屬一直未有定案。就呢個問題，天主教香港教區退休主教陳日君上周就特意到訪羅馬，點知就食檸檬，不獲教宗方濟各接見。佢喺呢趟行程更同駐當地記者會面，大談對於主教人選嘅想法。

事緣88歲嘅陳日君到咗羅馬之後，同一名駐梵蒂岡資深記者見面，對方喺網上報道咗佢哋嘅對話。陳日君話過去有個主意，就係由教區輔理主教夏志誠接任主教一位，豈料之後被告知佢地「需要一個被北京祝福嘅人」、即神父蔡惠民做繼任人，唔少人對呢個決定都大感不滿。佢又形容成件事好荒謬，批評「只係因北京願意，佢就成為首選」。

陳日君透露，今次寫咗封信想交俾教宗，信中提到若然真係由蔡惠民做主教，對香港教會嚟講將會係一場災難。佢又提到，已經告知教宗會喺羅馬逗留3至4日，希望對方可以電話聯絡自己，可惜一直等待都未有回音，最後只好將封信交俾教宗私人秘書。