政Whats噏:徐英偉避談區議會泛政治化 稱市民心中有數

20200929
東網電視
更多新聞短片
鄭泳舜(左)投訴有區議員唔服務部分市民,徐英偉(右)只答市民「心中有數」。
因新冠肺炎疫情緣故,加上立法會仲未復會,唔少議員都「匿埋」喺室內開直播。議員鄭泳舜(Vincent)今晚(29日)搵埋民政事務局局長徐英偉(Caspar)開台,批評依家好多區議會都泛政治化,而Caspar就話市民心中有數啦。唔知Vincent係咪「暗寸」,竟然回應「心中有數」都要有投訴渠道喎!
話說節目一開始,兩位都不停互捧、有講有笑。但後面Vincent講到好多泛民主派區議員成日因為市民政見不一,就選擇唔服務部分市民,仲批評區議會泛政治化,話民政局有責任,仲問Caspar點解決。而Caspar就話其實市民都會知道,亦會睇到該區活動是否合適、有否倒退,強調市民心中有數。而Vincent唔知係咪忍唔到口,就話心中有數都需要投訴渠道,話市民其實可以聯絡當區區議會秘書處,或者民政事務處喎。
另外,Vincent仲投訴,話好多三無大廈清潔衞生都出現問題,希望民政局跟進。但Caspar就只係避談,話大廈管理需要大家一齊推動,明白政府部門會聽到大家意見,同埋居住環境人人有責囉。局長答咗好似冇答咁,真係唔知好嬲定好笑呀!
至於政府成日被市民狠批離地。而Caspar就話覺得自己離地嘅時候,會多啲落地行吓,希望盲點少啲喎。咁睇嚟佢都真係需要抽多啲時間,落區了解民情,多啲同業界及市民溝通囉!