政Whats噏:栢志高離職恐成代罪羔羊 西九管理局難辭其咎 

2020年10月01日 10:03
東網電視
更多新聞短片
雖踢走栢志高,但西九項目呢個「爛攤子」,每個董事局成員都難辭其咎。
西九文化區管理局成立至今已經12年,但成個西九文化區項目問題一籮籮,唔單止嚴重超支,去年7月更曾出現施工地盤地陷情況。西九文化區管理局日前突然發聲明宣布,行政總裁栢志高將會提早離任,但未有交代離職原因。有西九管理局董事局成員就話,對於栢志高提早離任一啲都唔意外,仲大爆栢志高成日喺某些建設項目上先斬後奏,令董事局好不滿,已有共識想踼佢走。不過,既然董事局覺得栢志高自把自為,點解咁多年嚟都要忍佢呢?莫非成個董事局依家先瞓醒,見成個項目搞到「一鑊泡」,就急急推個人出嚟孭鑊祭旗?
西九董事局成員葉傲冬今日(1日)朝早出席一個電台節目時爆料話,栢志高同董事局一早唔啱牙,已失去互信,狠批佢成日自作主張,例如董事局經常都好遲先知道,喺某啲建設項目上,擅自修改原本建築設計,而且造價貴幾倍,鬧爆佢唔尊重董事局。
葉仲批評佢喺部分已落成建築物嘅裝修工程上未有嚴謹使用公帑,例如提交嘅預算金額嚇人,但經商討後又可以平價好多,鬧爆佢作為前高級公務員,做事唔符合「應使則使」原則,而佢作為行政總裁亦無做好負責同把關角色。咁講法,簡單啲講即係鬧栢志高係「大花筒」囉。
其實西九文化區工程超支一直被批評係無底深潭,政府最初2008年就話總工程預算係216億港元,惟工程延誤多年,至2019年單係綜合地庫工程申領嘅額外撥款已經接近236億港元。咁大型嘅工程,相信都唔會一個人話晒事,依家似乎想將責任推晒畀栢志高。作為局外人嘅西九博物館前顧問小組成員何慶基,就炮轟係文化區運作、營運模式及監管機制等出現嚴重缺失。
何慶基仲鬧爆,西九管理局負債嚴重,質疑西九文化區接二連三有行政總裁離任,董事局每次都「爆大鑊先補鑊」,狠斥管理局架構官僚,促請政府檢討。何又擔心,如果繼任人係公務員,只會令西九未來愈來愈有機會變成「爛攤子」同「和稀泥交到貨就收工」。
咁又係,與其話栢志高隻手遮天,倒不如話係成個董事局長期得過且過,明知有問題又唔出聲,事後先呻不被尊重,又疑似被人架空。講到尾,西九項目呢個「爛攤子」,每個董事局成員都難辭其咎,因為係管理不善嘅結果。西九文化區係一笪靚地,但可以搞10幾20年都唔知搞咗咩出嚟,唔怪得香港競爭力每況愈下,輸晒畀鄰近城市喇!