政Whats噏：何啟明加入勞福局　陳婉嫻話作用有限

縱橫政圈多年嘅工聯會榮譽會長陳婉嫻(嫻姐)同過好多政府官員交手，佢認為工聯會出身嘅勞工及福利局副局長何啟明入咗政府後，發揮到嘅作用始終有限，最多只係「高級政治助理」喎。咁又難怪嫻姐咁講嘅，事關何啟明做咗副局長之後，就唔再堅持爭取失業援助金，仲話諒解政府咁話，被質疑已經忘記咗初心。

嫻姐近日接受黨友鄧家彪網台節目訪問，大讚港人好有骨氣，個個寧願自食其力打工賺錢，都唔想攞綜援。然後借勢批評勞福局局長羅致光唔識對症下藥，只係叫失業嘅市民去申請綜援，但其實有好多人不合符資格，政府好應該推出臨時性質嘅失業援助金，放寬至個人名義申請，就已經可以解決問題。

嫻姐仲話，有從事飲食業嘅打工仔投訴，老闆要求佢哋預先透支今年同出年嘅假期，就此佢要求立法會議員質詢政府，到底咁做係咪屬於勞工處規管範圍，避免員工任人魚肉。嫻姐警告，政府推出三輪防疫抗疫基金無考慮基層問題，必須全面檢討抗疫政策，否則勞工界、工商界同專業人士會聯手反對政府施政，咁就好麻煩喇。