政Whats噏：徐英偉再約見面　區議員憂淪為政治騷

今屆區議會大部分由民主派主導，自上任以嚟同政府關係都唔多好。話說民政事務局局長徐英偉喺上任不久，曾約見區議會正、副主席，點知最終見唔成。有指雙方將於本周四(8日)再有會面機會，雖然今次會有區議員出席，不過就有人擔心會淪為政治騷。

政府同民主派區議員多次大鬥法，政府代表喺區議會會議上離場已經屢見不鮮，而且政府又計劃削減區議會撥款，惹來民主派區議員不滿，當中仲有區議員去申訴專員公署投訴。今次徐英偉同區議會正、副主席會面，據了解每區都應該會有代表出席，到時應該會討論同區議會有關嘅議題，包括民政事務專員離場、部分民主派區議員曾以辦事處作初選投票站，結果被扣起營運開支等等。

有民主派區議員認為，即使雙方會面都應該冇乜實際嘢可以傾到，擔心會淪為政治騷。話時話，其實徐英偉喺六月份都邀約過各區議會正、副主席會面，試圖破冰，之不過最後就慘食檸檬，仲有區議會主席寧願先做地區工作都唔想會面。今次徐英偉再度約見，唔知最後結局會點呢。