政Whats噏：泛民多次提名阻撓選舉　馬逢國四度爆粗

拉布可謂泛民議員嘅慣技，早前都試過有泛民阻撓委員會正副主席選舉成幾個月添。立法會今日(9日)適逢內務委員會主席選舉，泛民又繼續使出提名招數嚟阻撓選舉。而負責主持主席選舉、內委會副主席馬逢國不但鬧爆泛民濫用提名程序，更四度疑冇熄咪之下激動爆粗，包括「Ｘ那星、你老母」、「Ｘ那星、你老味」。事後佢辯稱唔知係咪自己講，又承認自己好多時情緒激動。上次馬逢國都試過講錯嘢搞到要道歉，今次衰多口狂爆粗，點到佢唔認數呢？

今次內委會主席選舉開始時，唔少泛民議員不停提名同埋提出規程問題，惹起部分建制派議員不滿，雙方繼而觸發口舌之爭。馬逢國認為只屬當事人嘅主觀理解而決定不予處理，不忿嘅泛民議員就譏諷馬逢國係「低級主席」。馬逢國斥責泛民議員阻撓選舉，之後隨即派發選票。當秘書收集議員選票時，佢就講咗句「X那星你老母」；相隔不足兩分鐘，馬逢國再講多次「X那星你老味」跟住就同秘書討論程序；當馬逢國要求提名人監票，冇耐又講多次「X那星你老味」。最後當秘書覆核選票時，馬逢國疑似㩒緊電話，然後就講咗句「你老味」。

喺選舉內委會副主席期間，議員鄺俊宇引述東網報道指馬逢國爆粗，希望成功連任嘅主席李慧琼可以處理。會議結束後，面對爆粗嘅指控嘅馬逢國一味話「係咪我講都唔知」，又話爆粗並非佢常用嘅語言，如果意識得到就唔會宣之於口咁話。不過佢就承認因會議被阻撓而情緒激動，話希望議會可以暢順進行先至會咁肉緊囉。

喺上一年度嘅內委會同埋財務委員會正、副主席選舉中，就因為泛民多次阻撓而搞到需要多次開會先完成，其中內會仲長達7個月添。尋日建制派一於快刀斬亂麻，不但取消選舉論壇，又要求唔想被提名嘅議員舉手示意，避免泛民有機可乘，結果喺一日內搞掂晒兩個會嘅正副主席選舉，其中財委會選主席只花半小時。

話雖如此，喺兩次會議期間，泛民繼續施展多次提名嘅手段，每一個委員會選舉都隨時多達7個以上嘅提名。最後李慧琼以得39票連任主席，馬逢國就有40票、財委會主席陳健波就獲36票、副主席陳振英就獲37票。