政Whats噏:小巴戴安全帶顯示屏有畫面冇聲 田北辰:形同虛設

20201013
東網電視
更多新聞短片
田北辰喺片段中扮演唔佩戴安全帶嘅麻煩乘客。
部分公共交通工具已配備安全帶,而根據《道路使用守則》,如公共小巴已裝有安全帶,乘客就必須佩戴。議員田北辰(田二少)尋日(12日)就拍片批評運輸署做一半唔做一半,事關部分小巴已設有顯示屏,如果乘客冇佩戴安全帶,顯示屏就會着紅燈提醒,而司機見到亦會作勸喻。之不過,佢話有時會出現司機勸喻無效,最後惟有照樣開車喇!
田二少喺社交平台上載影片,佢喺片段中扮演「超級麻煩乘客」,多次遭到司機勸喻後先肯佩戴安全帶。充當反面教材後,田二少就提醒市民,其實有安全帶就需要佩戴,希望唔好難為司機,否則出事都唔知邊個負責?不過,佢又話其實顯示屏形同虛設,部分乘客會「睇死」司機會照樣開車,而無視顯示屏上嘅紅燈囉。
咁點先解決到問題呢?田二少就建議運輸署為顯示屏加裝警號,倘若有人唔佩戴,車內就會有警告聲嘈到其他乘客,希望藉此逼唔聽話嘅市民戴返安全帶喎。田二少話運輸署都同意試一試,但佢都唔希望動用「最後方案」,一來經小巴營運商抗拒;二來佢話司機都唔想捲入漩渦、成為執法者喎。