政Whats噏:阻音樂噴泉工程 觀塘區議會無諮詢成立工作小組

20201013
東網電視
更多新聞短片
有建制派區議員質疑,海濱音樂泉己開展工程,唔明白觀塘區議會成立工作小組有何用。
觀塘區議會日前召開會議,討論海濱音樂噴泉工程社區重點項目,期間主席蔡澤鴻突然建議成立有公眾參與嘅工作小組,結果更以大比數獲得通過,蔡澤鴻亦獲得區議會授權,以區議會名義研究採取司法覆核等法律行動跟進,但有建制派區議員質疑,指未經諮詢嘅情況下成立工作小組,批評做法違規,而小組實質要做啲咩亦都唔清唔楚。蔡澤鴻事後認衰,承認事前並無諮詢區議員。
觀塘區議會早在換屆之初,就通過要求暫停音樂噴泉工程,但遭民政事務總署拒絕。而區議員梁凱晴曾經喺今年5月提出司法覆核,要求暫緩工程。至會議當日,蔡澤鴻就話,曾要求民政事務總署提交工程合約供研究但被拒絕,建議設立一個有公眾參與、跟進音樂噴泉嘅工作小組,而有關工作需與民政事務總署「交手」,故唔需要民政處提供秘書服務。蔡又強調,好多觀塘區市民一直關注事情發展,縱使工程已完成了三分之二,但仍要思考再遇政府「小白象」工程時,區議員應該肩負點樣嘅角色,又指成立工作小組唔係搵嘢黎搞,而係有其必要性。
工聯會區議員簡銘東質疑,指蔡澤鴻利用區議會名義成立工作小組跟進工程,但「飛起」民政處提供秘書服務,簡批評做法違規,形容「霸區議會個名做獨立王國」。簡又指音樂噴泉工程現正進行中,唔明點解喺呢個時候成立小組,究竟有咩實質用處,嚟緊要點樣做,做啲咩,統統都係未知之數,其他區議員亦不知情,質疑主席無諮詢就成立小組,就連民主派議員都蒙在鼓裡,絲毫不知工作小組內容及方向,而蔡澤鴻喺會上亦無明確答案,無解答工作小組未來要做啲咩,只舉例話去請願又得、提司法覆核都得,總之含糊其詞,讓人摸不著頭腦。
除程序上有問題,簡仲話上一届已決定嘅工程項目,且建造工程正進行中,依家先至貿然成立小組,可以話係浪費公帑,浪費區議會資源。簡又提到,即使大家往好嘅方向諗,成立小組係為咗優化設施,以達到便利街坊等,但現階段因欠缺透明度,令大家感到不妥,問題實在嚴重。
蔡澤鴻接受查詢時承認,事前未有諮詢區議員,會檢討做法。對於民政事務總署以簽定保密協議為由,拒絕公開工程合約內容,蔡澤鴻透露或會採用司法覆核等法律途徑,要求署方公開合約,又話區議會作為民選代表,明白市民有期望,但礙於建制派當年喺區議會同立法會財務委員會上投票通過,最終無辦法撤回撥款,區議會亦無從監察,反問「咁樣點同市民交代」,因此期望透過工作小組嘅形式,邀請區內市民同團體出席研討會表達意見。