政Whats噏﹕市民冀提取強積金救命　許正宇以「劏雞論」拒絕

舊年6月爆發嘅反修例風波到依家仲未平息，再加上新冠肺炎疫情重創本港經濟，坊間唔少聲音希望可以提取部分強積金渡過難關，但財經事務及庫務局局長許正宇就用劏雞作比喻，話未養大隻雞就攞去劏，將來就乜都無，再度拒絕建議。其實隻雞養唔養得大都無人保證到，講到尾政府都係想唔做唔錯，同埋想保住啲基金或保險業飯碗至真。

許正宇同議員葛珮帆(EQ)一齊拍片為本港財經拆局，EQ提到好多市民都希望可以攞番強積金供款作救命錢，但許正宇就由頭講起，叫大家諗返轉頭，話當初推出強積金嘅原意係作退休保障，仲大打比喻話成件事好似養雞咁，要養大先攞去劏，依家未養大就劏，將來就乜都無喇！

不過，EQ聽完就有啲無奈，話好多市民都覺得等唔到政府幫手，又無失業援助金，政府嘅財政儲備一直削減，又無可能長遠持續派錢，市民只係希望喺艱難時期可以攞番自己啲錢救命，許於是辯駁話政府推出嘅3輪防疫抗疫基金已經考慮咗市民需求喎。

許正宇又話其實攞返強積金呢個建議並唔係第1次有人提出，2003年沙士以至香港出現其他金融災難時都已經有人提過。

其實咪就係政府踢極都唔郁囉！面對現時嘅財政困難，跨黨派都多次進言，要求再度全民派錢又唔聽，要求提供失業援助金照樣唔理。嚟緊又無第3輪保就業計劃，預計12月就會出現裁員潮，市民已經降低要求，唔奢望政府派錢，只係想攞返自己嘅錢都唔得。早前都有政黨幫政府計埋數，建議政府容許市民以1次性方式提取僱員供款部分嘅強積金，上限係10萬港元或者係累計權益嘅五成，商界亦認為僱員動用自己供款部分嘅強積金，對日後退休影響有限。

話時話，積金局截至今年9月底嘅強積金資產總值已逾1萬億港元，唔知許正宇想養到隻雞幾大先可以攞去劏呢？但依家經濟咁差，唔好話買雞，市民連飯都無得開呀！

財金世界成日令人感覺離地，EQ話以前財庫局畀人感覺距離都好遙遠，直情係掂都掂唔到，希望許正宇年輕啲，處事方式開放啲，要聽多啲市民意見咁話。