政Whats噏:許正宇自爆有脫髮危機 驚市民認錯係陳帆

20201017
東網電視
更多新聞短片
許正宇(左)今朝出席電台節目時,被市民追問由陳帆(右)主責嘅一手樓空置稅。
運輸及房屋局局長陳帆早前為施政報告公眾諮詢拍攝宣傳片時,就認同有唔少網民話佢嘅髮型幾特別,更加話因為有呢個髮型,即使自己依家喺疫情之下要戴住口罩,啲市民都仲認得佢喎!之不過,財經事務及庫務局局長許正宇就未必會認同呢番說話,事關佢今朝(17日)出席電台峰煙節目時,就畀市民當咗係陳帆,搞到許正宇都不禁自嘲開始甩頭髮添!
立法會內務委員會尋日(16日)開會時透露,政府考慮暫停推動一手樓空置稅,引發社會上唔少市民討論。許正宇今朝出席一個電台峰煙節目時,亦遇到有市民打嚟表達不滿,許就暗指自己唔係主責房屋政策嘅陳帆,更加笑言唔希望因為做咗呢份工之後頭髮甩咗,搞到俾市民誤會咗係另一個局長添!
查實許正宇今年4月先上任,入咗「熱廚房」僅半年時間已經開始出現脫髮危機,實屬令人擔心。之不過,喺現屆班子入面都有唔少高官有類似問題,睇嚟許都有唔少對象可以請教心得喇!