政Whats噏:違法文宣拆唔掂 滅鼠不力 何俊賢搵陳肇始算帳

20201017
東網電視
更多新聞短片
陳肇始被轟滅鼠不力、違法文宣又拆唔掂。
立法會各個事務委員會日前陸續選出正、副主席,其中食物安全及環境衞生事務委員會主席就由漁農界議員何俊賢(高佬賢)當選,事後佢喺社交平台一連發布2個貼文,提到當選後將會着重做嘅嘢,包括拆非法文宣、掃老鼠曱甴等事項,仲話唔好等要即刻做咁話,睇嚟勢在必行。佢話呢啲係食物環境衞生署(食環署)責任,但食物及衞生局(食衞局)都責無旁貸,未來會搵局長陳肇始算帳!
高佬賢講完當選目標後,隨即吸引大批網民留言,大多都關注去年反修例運動帶嚟嘅文宣問題,支持立即大掃除,盡快拆晒所有違法宣傳品,還市民一個乾淨社區及街道,建議唔好齋拆,仲要追究責任,唔係就會沒完沒了,希望佢係立法層面發揮更大作用,阻嚇反中亂港黑文宣背後嘅黑勢力。
同一時間,亦有唔少人不滿食環署,鬧爆係全香港最廢,叫高佬賢要好好清算、重整呢班廢官,仲質問食環署係咪瞓咗?好耐唔見人咁話。另有網民留言,促請高佬賢「睇住」署長劉利群,責成佢嚴厲執法、上立法會回應質詢,又或者炒咗佢算喇!
面對班網民留言鬧爆,高佬賢就話會先認真睇睇積壓議程,重新審視重要性,坦言社會喺1年半時間轉變太快,有啲嘢嘅重要性改變咗,可能變得冇咁重要,又或者都係咁重要。佢舉例,好似有啲工程,重置垃圾收集站同社區回收中心等,要進一步考慮時限問題,遲咗做會否貴咗等都要去諗。
另外,就係環境清潔問題,高佬賢話呢個係好多市民關心,亦都一直認同要做嘅,如清理違法文宣、老鼠曱甴,所以佢會將呢個新議題優先處理。佢提到,呢個唔單止係清理問題,仲係資源配置問題,過去違法文宣一直處理唔好,全因政府無增設特遣隊去做,先會拆完又貼,貼完又拆。
佢仲話環境衞生係劉利群主責,佢絕對無得唔理,未來會邀請對方上立法會,不過署方都只係執法部門,政策制定等都仍係局長陳肇始要做嘅,因此嚟緊會同陳討論係咪要增加署方權力、資源甚至地區合作等。
不但如此,佢仲鬧喺過去一段時間,陳都只理疫情,其他嘢根本無暇兼顧,孭咁多嘢上身,副局長徐德義又唔主動分擔,搞得掂醫療又搞唔掂衞生,建議政府不如真係「拆局」,分番開兩部分,免得好似依家咁兩頭唔到岸啦!