政Whats噏:聶德權登獅子山甩「底」 行山客唔認得佢

2020年10月17日 22:04
東網電視
更多新聞短片
聶德權今早登上獅子山,但期間竟然甩「底」。
疫情爆發超過大半年仍未受控,再加上有社交限制,市民真係抗疫疲勞,去到周末梗係想去郊外走走吸下新鮮空氣。但公務員事務局局長聶德權就竟然甩「底」!唔係因為爽約甩底唔行山,而係講緊係佢對行山鞋呀!話說佢喺Facebook貼文,話今朝早行上獅子山,仲話今次好認真,搵返幾年前冇着過嘅行山鞋出嚟着,點知如佢所料,行山途中已經甩底。
既然咁認真搵對行山鞋,又預料會甩底,係咪應該搵過另一對鞋呀!咁唔使甩轆喇!搞成咁點算好?結果佢用咗「土法」救急,成功完成登山旅程。乜嘢係「土法」救急?佢就冇講喎。
佢仲話沿途遇到啲行山人士,其中一位仲對佢講:「你個額頭咁似聶德權!」即係認唔出佢喇,而認出佢嘅行山常客就向佢展示喺「超靚」角度拍攝嘅望夫石同獅子山頂照片。另外仲遇到一個退休朋友,同佢分享咗乜嘢係疫境中嘅正能量咁話。
喺貼文出街後,有網友大讚獅子山風景好靚,但有網友留言「一定要清理政府內的瘀血」。唔知呢位網友講緊邊啲「瘀血」呢?又係咪同近日政府要推行公務員宣誓有關呢?