政Whats噏:憂中美角力下被制裁 有局長、副局長向陳振英請教

2020年10月17日 22:24
東網電視
更多新聞短片
陳振英透露,近日有個別政界人士向佢查詢,應否開設多幾間唔同銀行嘅戶口。
現時中美兩個大國處於角力狀態,美國政府先後兩度向中港兩地官員作出制裁,令本港唔少政圈中人都擔心會備受牽連。金融界議員陳振英(Ronick)透露,近日有個別問責官員、常任秘書長同建制派議員向佢徵詢意見,考慮開設多幾間唔同銀行嘅戶口,分散投資。
Ronick話做好個人資產嘅風險管理係一件非常合理嘅事,所以當有人向佢查詢時,佢都會樂意提供意見作参考。佢強調,任何人管理自己嘅資產時,都應該考慮多元化配置,唔應該過分集中喺某一個類别。
佢又指出,呢一點亦尤其適用於政界人士,所以建議佢哋喺使用銀行服務,以至同信用卡公司、證券公司、資產管理公司等其他服務供應商往來時,都唔應該太過集中,應分散風險。
繼美國財政部8月公布制裁10名香港同內地嘅官員,以及1名前官員,華府日前再根據《香港自治法》向國會提交報告,宣布再制裁其中10人,並警告國際金融機構唔好同受制裁人士交易,否則可能亦會被嚴厲制裁。