政Whats噏:踢走許智峯關鍵一票 梁君彥疑十五十六拒表態

20201018
東網電視
更多新聞短片
梁君彥疑對踢走許智峯十五十六。
現時至少5名非建制派立法會議員面臨動議纏身,其中民主黨許智峯「搶手機案」早前被判罪成,隨着立法會復會,許智峯將首當其衝,面對因譴責動議而失去議席嘅危機。由於建制派與非建制派議席差距已達41對21席,若果許智峯喺表決時避席,立法會主席梁君彥投票與否將成關鍵,影響建制派能否有足夠票數踢走對方。不過,尋日梁君彥就淨係話會參考過去主席嘅做法,預計有關動議11月初先會喺大會處理,到時佢先再決定點做喎。
許智峯兩年前喺立法會大樓內,搶走保安局一名女行政主任手機嘅案件,去年被東區法院裁定罪名成立。及後立法會成立調查委員會,完成調查後裁定佢行為不檢,足以構成譴責嘅理據,但礙於會期接近完結,趕唔切交付大會審議。隨着立法會延任嘅會期展開,相信許智峯好快就要面對有關嘅譴責動議。
調查委員會主席麥美娟就話,許智峯搶手機都調查咗成年,建制亦一定會追究,幾時投票譴責許智峯就要視乎梁君彥點樣排議程,估計都要先處理完政府法案。至於動議能否如建制派所願獲通過,關鍵在於梁君彥手上嘅一票。對於若果有議員提出譴責許智峯議案,泛民中人指現時未有討論,留待事情發生再應付。
根據《基本法》規定,對行為不檢嘅議員提出譴責動議,需要獲得在席議員三分之二嘅支持先至可以通過;而《議事規則》亦規定,與表決議題有直接金錢利益關係嘅議員需要喺表決時退席。而譴責議案牽涉到議席能否保留,以及繼續獲取薪酬嘅問題,所以同樣要避席。
假設許智峯喺表決動議時避席,在席議員剩61位,即需要連同梁君彥在內、共41名全體建制派議員投票支持,先剛好夠票踢走許智峯。按照慣例,立法會主席為保持中立多數都唔會投票,但有關做法就無明文規定,所以梁君彥投票與否足以左右結果。不過,梁被問到有關投票取向時,就只係話會參考歷任主席嘅做法,到有關動議提交上大會審議時先會決定;又指現時會先處理議程上嘅政府法案,預計約3星期後先可處理許嘅譴責動議。對於日前務委員會選舉正副主席期間,許智峯搶選票事作,梁稱之後睇吓行管會會否討論,要等下次開會再決定。
除咗許智峯外,另外仲有4名非建制派議員,包括鄭松泰、林卓廷、毛孟靜及郭榮鏗嘅譴責議案仍要等待成立調查委員會作進一步調查,相信除非建制派全力追擊、加快行動進度,否則都仲需要啲時間去算呢筆帳。