政Whats噏：阻研立法禁侮辱公職人員　泛民被鬧爆唔做功課

喺舊年6月爆發嘅反修例風波至今仍未平息，話說立法會公務員及資助機構員工事務委員會今日（19日）舉行會議，詢問委員嚟緊呢年想討論乜嘢議程，議員葛珮帆(EQ)就去信委員會主席郭偉強，希望討論立法禁止侮辱公職人員等，點知泛民議員就玩嘢，攻擊建制派政黨之餘，仲要求研究埋禁止公職人員侮辱市民喎。

會議上，EQ要求盡快討論包括立法禁止侮辱公職人員、公務員宣誓建議嘅研究進展、公務員嘅福利及退休年齡安排等6項議程。點知議員林卓廷質疑議員作為公職人員，倘若建制派政黨嘅議員在街道上被市民責罵，係咪會構成犯罪？另有泛民議員質疑公務員宣誓屬迫害，認為要研究埋公職人員侮辱市民添！

EQ唔知係咪唔忿氣，隨即反駁話泛民唔做功課，解釋話委員會討論立法禁止侮辱公職人員已有一段時間，而政府都已經提出公務員宣誓，反問點解唔可以傾相關議程？佢又大鬧泛民唔知喺到做咩，質疑佢哋根本唔知委員會過往研究、討論緊啲乜嘢囉！