政Whats噏：立法會保安未見鬆懈　外圍加裝巨型鐵板

去年曾被反修例示威者衝擊及包圍嘅灣仔警察總部，早前已拆走放置喺外圍超過一年嘅巨型水馬陣，相反曾在去年7月1日受示威者嚴重衝擊及佔領嘅立法會大樓，保安就愈趨嚴密。東網記者今午(21日)發現，添美道對出嘅立法會大樓外，繼續有水馬陣圍封外，大樓外再加裝數塊巨型鐵板。

立法會大樓外牆加上嘅巨型鐵板，係裝喺鎖上鐵鏈嘅閘門上，據了解嗰到亦喺示威當日受到嚴重破壞。立法會秘書處回覆查詢時指，大樓於去年7月1日及2日遭示威者闖入後，行政管理委員會委聘保安顧問就大樓嘅整體保安進行全面檢討，其中包括為大樓外圍加裝保護設施，而今次加裝嘅工程由本月中開始。

不過，自《港區國安法》生效後，有關嘅示威衝突都少之有少，唔知立法會幾時先可以好似警總咁拆走水馬陣呢？