政Whats噏:林健鋒牛一 梁君彥提醒開香檳小心被罰

2020年10月23日 18:31
東網電視
更多新聞短片
為防整濕地氈,林健鋒(左二)開香檳小心翼翼。(陳嘉順攝)
立法會議員林健鋒(Jeffrey)今日(23日)同一眾黨友慶祝佢嘅69歲生日,得到黨友張華峰(肥老闆)所送嘅生日蛋糕,加上議辦職員準備嘅另外兩個蛋糕,認真係三喜臨門!肥老闆仲特地帶咗枝香檳嚟賀一賀,不過在旁嘅大主席梁君彥就提醒Jeffrey開嘅時候要小心啲:「整落地氈要罰你11萬㗎!」
開完香檳後,Jeffrey就同大家分享佢今年嘅生日願望,話作為工商界嘅代表,當然希望香港可以盡快同其他地方恢復通關,個個有工做、有飯食。佢又話,仔仔唔單止晏晝同佢一齊食飯,晚上亦都為佢安排好節目。被問到想唔想仔仔快啲結婚?Jeffrey就話,呢個係每個父母嘅希望喎。
講返今日議辦職員準備嘅兩個生日蛋糕,今年嘅祝福語句繼續由肥老闆題字,其中一個就一如往年咁大玩食字,祝願「乘鋒破浪」!另一塊就因應時事,祝福牌寫上「衝出疫境」,Jeffrey之後仲拎起佢咬咗一角,形容自己「食咗個疫境」添!