政Whats噏:被提醒或送返內地受審 漢奸黎稱會認嫖妓

2020年10月25日 19:02
東網電視
更多新聞短片
官司纏身嘅黎智英自爆,曾被李柱銘提醒要有心理準備被返內地。
有「漢奸黎」之稱嘅壹傳媒黎智英官司纏身,今午(25日)喺網台節目上,自爆早前同佢一齊被官媒炮轟為「叛國禍港四人幫」嘅民主黨創黨主席李柱銘(李漢奸)食飯時,李漢奸提醒佢要做好心理準備會被送返內地,佢就話依家唔會為自己製造心理負擔,仲揚言「嚟到我咪食囉」,嚟之前一日都唔會諗喎。但隔咗一陣被問到如果認罪時會選擇「經濟犯罪」定係「嫖妓」,漢奸黎就話揀嫖妓喎。咁到底係到時先諗,定係一早已經諗好咗呢?
漢奸黎早前以涉嫌觸犯《港區國安法》中「勾結外國或者境外勢力危害國家安全罪」及串謀詐騙等罪名被捕。由於過往有啲事件,內地傳媒曾播出被捕人士認罪畫面,有網民今日喺網台節目中,問漢奸黎會唔會擔心發生類似情況同埋人身安全?佢就話自己唔會諗呢啲嘢。
之後漢奸黎就自爆同李漢奸食飯時,對方就叫佢要有準備,包括心理準備被送返內地。不過佢就多次稱唔會諗,仲話嚟到就食,反問點解要畀自己有心理負擔,「何必呢?」佢認為,每日都諗被送返內地、內地坐監情況係只會影響情緒、糟質自己,「做得一日得一日,過得一日得一日」。佢仲話自己作為信徒,無論發生咩事都會交畀天主。
其後現場嘉賓再問漢奸黎,如果要用普通話認罪,佢嘅普通話能力又點呢?漢奸黎就自詡普通話能力「係得嘅」,更即場應嘉賓要求,以普通話讀出「對不起我有罪」,但就畀嘉賓笑,話佢唔夠誠懇,要溫柔啲。
漢奸黎又話依家諗唔到幾時會屈服認罪,要等事情發生先知。隨後被問到會點揀認罪,佢先話「揀咩都冇用喇」,不過又話自己已經70幾歲,話嫖妓都冇人信㗎喇,「咁我都要認嫖妓囉」。此話一出就惹來陣陣笑聲,仲有嘉賓笑返佢話「你個樣嫖妓都幾好笑喎」、「可能齋傾啫」。黎就笑笑口話,明知冇人信所以認,最冇人信嘅先會認。
漢奸黎被捕後曾多次表明,話自己唔會離開香港,今日又再表明話一定唔會離開香港,解釋話自己又做傳媒,又投入民主運動,冇可能離開,否則「仲衰仔」。但同時佢又話,如果仲經營服裝生意,亦從未涉及政治嘅話,就會賣盤離開。
其實漢奸黎過往嘅言論都一時一樣,佢曾經講過唔會賣壹傳媒本港業務,否則一世變契弟,點知幾年前反口「出賣」包括香港《壹週刊》等雜誌業務,被員工怒斥佢做「契弟」。到底做完契弟又會唔會做衰仔呢?大家可以放長雙眼去睇!