政Whats噏：WhatsApp病毒防唔到　政界斥陳肇始令香港百毒可侵

食物及衞生局局長陳肇始1個WhatsApp帳戶早前曾被入侵，該局回覆話今日(26日)已向警方提供資料以作所需跟進。話時話，新冠肺炎疫情持續將近1年，有政界人士同學者批評陳肇始WhatsApp病毒都防唔到，唔怪得新冠病毒都防唔到，令香港百毒可侵；有議員更狠批食衞局處理事件態度鬆懈，呢種鬆懈嘅工作文化亦影響抗疫工作，令人憂慮。

食衞局嘅新聞秘書證實，局長1個WhatsApp帳戶早前曾經被侵入而短暫未能使用。經資訊科技組同事跟進同檢查後，至今未有發現有同政府工作相關嘅資料外洩，而食物及衞生局已經將事件立即通報政府資訊科技總監辦公室同政府資訊保安事故應變辦事處。據了解，以往政府有新嘅防疫措施出爐，陳肇始都會透過WhatsApp通知相關持份者，近日佢轉為透過其助理傳送相關短訊。

對於今次事件，立法會食物安全及環境衞生事務委員會主席何俊賢（高佬賢）批評陳肇始同食衞局處理事件手法不當，無交代事件嘅詳情。高佬賢認為局方應即時通知公眾，並調查其他司長同局長有無出現同樣情況，令議員同政府內部有所防範。佢直指食衞局處理今次事件嘅態度散慢，無周詳考慮可能引伸出嚟嘅後果，而鬆懈嘅工作文化亦體現係抗疫工作上，影響防疫部署。

老實講，外界不斷炮轟政府抗疫同防疫不力，後知後覺兼且慢幾十拍，令到疫情遲遲未受控。香港理工大學專業及持續教育學院講師陳偉強亦話，即使當局稱未有發現有同政府工作相關嘅資料外洩，但仍然會令市民質疑，而陳肇始企喺防疫最前線，知道防疫政策，手機被入侵將會阻礙防疫工作，有機會造成疫情加劇或反覆。

另1名議員葛珮帆（EQ）就對事件感到離奇，佢話會透過WhatsApp同陳肇始作公事溝通，所以有心理準備雙方嘅通話資訊可能遭到外洩。EQ笑言：「唔知局長點樣洩露自己嘅密碼畀人知道。」佢又呼籲政府各官員都要留意個人私隱，避免重要嘅資料遭到外洩。

香港資訊科技商會榮譽會長方保僑就話一般嚟講，WhatsApp帳戶被盜用多數係因為未有開啟兩步驗證；亦有情況係騙徒假冒他人，騙取兩步驗證碼，一旦中計，就會被奪WhatsApp操控權。佢估計，可能係陳肇始無啟動「兩步認證」、或者按入一啲不明來歷嘅連結，亦有可能係有人知道陳嘅電話號碼，撞入陳嘅帳戶。