政Whats噏：西九文化區項目問題多　議員促管理局到立會交代

西九文化區項目嚴重超支，施工地盤亦曾出現下陷情況。立法會發展事務委員會今日(27日)舉行會議，討論喺發展事務委員會同埋民政事務委員會轄下，委任2020至2021年度會期委任監察西九文化區計劃推行情況聯合小組委員會。有議員要求喺首次小組委員會會議上，邀請西九文化區管理局過嚟交代行政總裁栢志高點解會提早請辭，順手交代埋現時嘅財務狀況，確保唔會再向財務委員會申請額外撥款喎。

話說會議上講起今年再度委任議員監察西九文化區嘅情況。議員鄺俊宇話西九文化區曾經超支，鬧爆西九文化區嘅使費係「海鮮價」、「M+視覺文化博物館」更係一拖再拖，質疑項目倘若超支，西九管理局就會又上財會拎錢。鄺要求小組委員會向西九管理局施壓，並向議會作出交代。議員鄭松泰就質疑栢志高提早離職，可能涉及西九管理局嘅決策問題，甚至牽涉某啲事故，促請小組委員會要求西九管理局清楚解釋，強調公眾有權知道原因。

其實西九文化區項目早就被人質疑倒錢落海。睇返過往資料，政府喺2008年就話總工程預算係216億港元，但2019年單係綜合地庫工程申領嘅額外撥款已經接近236億港元。西九文化區管理局同埋栢志高喺雙方同意下，栢志高會提早喺下月28日正式離職，難免令外界生疑，栢志高係搞唔掂而走嘅。

而會議上爭議嘅議題就係沙田污水處理廠搬遷計劃，無論係開設職位，定係搬遷問題都有唔少拗撬。沙田污水處理廠搬遷計劃將進入第2階段，政府話人手不足，需要增設常額職位。建築、測量、都市規劃及園境界議員謝偉銓就話，渠務署應申請臨時職位處理，又話政府應規劃研究搬遷之後所騰出嘅28公頃空置土地，否則就會浪費搬遷費用。議員柯創盛就質疑，政府申請常額職位毫無理據，促政府精簡人手，或者以內部調配人手方式解決問題。鄺俊宇就狠批總工程師職位月薪高達15萬港元，質疑政府唔係開發岩洞，而是開展「無底深潭」，同埋要求政府確保工程唔會超支。

之不過，政府就唔係咁諗喎。發展局副局長廖振新話，喺污水廠搬遷過後，政府就會研究同規劃該空置土地嘅用途，認為政府可克服環境、交通等問題，並喺該土地上建屋。廖估計土地喺2031年就會騰空，到時政府會適時進行研究，預料規劃需研究3至4年。

對於新職位及搬遷費用高昂。廖振新話如果政府冇足夠人手，反而會加大超支風險。渠務署署長盧國華就強調，署方已檢視人手，認為渠務署現時人手不足，話政府無計可施之下先至申請職位，否則由現有嘅工程師兼任搬遷工程將會不勝負荷喎。