政Whats噏:議員接種流感疫苗 馬逢國露「香肩」驚走光

20201028
東網電視
更多新聞短片
馬逢國(左)解開恤衫鈕扣又露出咗一半「香肩」。(黃偉邦攝)
臨近流感高峰期,立法會今日(28日)一如往年,搞咗場接種流感疫苗活動,一班議員趁會議空檔時間去打針。每年議員打針都會出現啲有趣嘅畫面,今年都唔例外,體育、演藝、文化及出版界議員馬逢國打針時就未有好似其他人捲起衫袖,反而露出咗一半「香肩」方便護士打針,呢個畫面成為全場焦點!
唔少議員因為著西裝、恤衫,所以打針之時都要捲起衣袖,又或者到屏風後面除咗件衫去打針。之不過,馬國逢就未有咁做,反而喺一班記者面前坐定定解開恤衫鈕扣,露出左邊「香肩」畀護士打針,更用右手撳住件衫以防走光,同喺隔籬為咗方便打針而着短袖衫嘅議員田北辰形成強烈對比,隨即吸引眾人目光。
睇返尋日成個打針過程,基本上每位議員都好淡定,唯獨議員陳克勤(克勤)就好緊張,仲叫在場監督嘅食物及衞生局局長陳肇始講個笑話嚟聽吓。至於克勤做咩咁肉緊呢?佢就話「要畀針拮,驚㗎嘛」,之不過未等到人家開口講笑話,接種疫苗己告完成。
另外,一班議員打針前都要先量體溫,入場位置亦設置咗一個坐地式嘅體溫探熱器。唔少人為咗方便都以手掌代替額頭去量度體溫,對於身高逾1米9嘅議員何俊賢(高佬賢)嚟講,要用額頭量體溫就須俯首哈腰,難免有一定難度。
當高佬賢見到建制派「班長」廖長江行到探熱器旁邊,就講笑話班長高度同探熱機相若,叫佢用額頭量體溫,仲直接拎起個探熱器朝向班長。之不過,高佬賢咁樣講笑怕唔怕班長嬲架?佢就話唔好睇班長平時好嚴肅,但佢份人其實好玩得㗎。
今年冬季正值新冠病毒同季節性流感雙重夾擊,尋日就有37位議員參與接種季節性流感疫苗活動,人數係自2015年首次舉辦呢項活動以來最高。