政Whats噏：建制搶佔陳淑莊帳委會空缺　容海恩戰楊岳橋

大律師陳淑莊早前拒絕延任立法會1年，監察政府公帑運用嘅政府帳目委員會隨之出現空缺，近日有消息指，泛民會畀返公民黨嘅議員頂替陳嘅位置，將會派出該黨黨魁楊岳橋上陣，不過，諗就係咁諗，現實似乎無咁順利，事關建制方面都有人選，就係新民黨嘅容海恩啦！

根據立法會內務委員會本周五會議議程，屆時將會選舉1名議員，填補政府帳目委員會席位空缺。據了解，楊岳橋有意填補席位空缺，惟有消息指建制則將派出容海恩「出戰」。

帳委會嘅組合有7名議員，喺陳淑莊唔延任議員後，只剩6人。帳委會由石禮謙擔任主席、梁繼昌為副主席，成員包括謝偉俊、何俊賢、林卓廷同邵家輝，建制佔4人，而泛民僅2人。

帳委會呢個空缺，建制想搶佔，泛民就要力保不失，預計喺內會當日又會上演一場大戰，建制肯定會坐定定，唔畀泛民玩嘢喇！