政Whats噏：泛民拉布令立會又流會　易志明激到喊？

泛民主派繼續以點算法定人數方式拉布，令立法會大會再度流會，喺嗰刻見到航運交通界議員易志明(Frankie)「落淚」。唔通係畀一班泛民激到喊？

話說響緊點票鐘、Call議員返會議廳開會嗰陣，Frankie就喺位上攞紙巾不停抹眼淚喎。其實佢係滴緊眼藥水，手上攞住唔止1枝眼藥水，仲要滴咗幾吓添！

原來Frankie前排做完白內障手術，醫生用心良苦咁勸喻佢要多加休息，但Frankie話邊有得休息吖，仲指住手上裝滿文件嘅環保袋，話啲文件最麻煩、有排睇。做完白內障手術會畏光，但無可避免要喺夠光嘅環境下睇文件，所以要不停滴眼藥水，但見到Frankie對眼都係紅晒，淚水汪汪咁。

日前先講完議員黃定光(象哥)前排都做完白內障手術，覆診嗰陣要滴藥水，放大瞳孔以作檢查，但同時會令雙眼畏光，所以開會嗰陣要戴「黑超」。Frankie都話做完手術，其實係要戴副黑超比較好，睇嚟佢都要準備吓先得喇！