政Whats噏： 傳建制不滿黃錦星　將垃圾徵費推畀泛民　

本來因立法會任期完結而胎死腹中嘅《2018年廢物處置(都市固體廢物收費)(修訂)條例草案》（垃圾徵費），隨住立法會會期延長一年後，立法會決定重設法案委員會繼續審議條例草案。有關法案委員會今日（3日）舉行首次會議，選舉正、副主席，最終均由泛民包攬。之但係，建制咁着緊嘅垃圾徵費，最後竟然將主席位拱手相讓？

主席最終由會計界議員梁繼昌以19票擊敗取得15票的議員易志明當選主席，而副主席則由議員許智峯喺無競爭下自動當選。正副主席均由泛民奪得，令人百思不得其解。問返建制派「副班長」陳克勤，佢就話呢個結果根本係環境局局長黃錦星所致，認為叫議員加入法案委員會或箍票都應該係佢嘅責任，而佢估計黃知道佢哋唔係好撐垃圾徵費，所以唔落力拉建制，默許泛民做正副主席，覺得黃半推半就，耍蠱惑咁話。

而會議期間，法案委員會要討論究竟係從頭重新審議，定還是按之前進度繼續審議，但主席梁繼昌就突然唔主持，話要去開議事規則委員會，畀咗副主席許智峯，最終仲決定唔由頭審議條草案。克勤就質疑合法性，覺得咁做法有問題，隨時有機會畀人司法覆核，擔心會因快得慢。

至於如果泛民真係好快過咗，將條例草案擺上大會，到時建制點算？克勤就話唔怕，到時再傾都唔遲，同埋佢覺得建制喺法案委員會階段同樣會再提意見，好似建議唔好一開始就收費，應逐步減少派膠袋等，如果政府肯聽肯改，佢哋都會支持喎。