政Whats噏：商界議員倡重新審議垃圾徵費草案　意味有排拖

因為立法會喺今年6月終止審議都市固體廢物收費草案，導致醞釀15年、原定有望喺今年年底落實嘅垃圾徵費計劃胎死腹中！但隨着立法會延任不少於1年或可翻生，點知今日(16日)喺審議相關法案嘅委員會會議上，有商界議員話因泛民主派退場，可重新審議議案。咁即係話議案有機會推倒重來，仲有排拖。

喺立法會《2018年廢物處置(都市固體廢物收費)(修訂)條例草案》委員會會議上，有委員提出係咪應該承接過去嘅討論，抑或應該重新由頭審議，喺聽過法律顧問嘅解釋後，委員會列出3個方案，即係從頭審議；承接上次嘅討論；或中間着墨的方式，今年可寬鬆處理，明年才加緊討論。

飲食界議員張宇人同批發及零售界議員邵家輝都話唔反對重新審議。邵家輝話依家嘅委員人數已經唔同，連正、副主席亦有變，其實同當初嘅委員會已有出入，「在程序公義上已有問題」，佢話新委員雖然可以「溫書」了解過去嘅討論，但都只限於「聽」，新委員或者唔同意過往決定，「甚至可能令議案停止或更快」，但當時委員會嘅決定喺依家已屬過去式，佢強調喺程序公義下，應重新審議。

張宇人話喺過去幾個月，立法會嘅人事等問題已有一定改變，認為有需要重新審議草案，佢話自己現時仍有7、8頁紙嘅問題未獲政府回答，若果唔從頭審議，「大家在中間開始，會摸不着頭腦」。佢又話副局長有「兩手準備」，解讀為唔反對重新審議。另一議員陳克勤亦提到希望徵詢律政司意見，以免日後委員會決定會面臨司法覆核。

環境局副局長謝展寰話考慮到現時委員會內有委員早前並無參與討論，或對議題毫不熟悉，不論決定係點，局方亦會準備資料同幻燈片嚟詳細解釋計劃，免得被外界質疑。委員會副主席何俊賢就話喺聽完政府、議會意見後會同主席易志明商討委員會未來嘅前途、方式、方法，再作決定。

政府早喺2005年已提出垃圾徵費計劃，直至2018年11月正式向立法會提交有關草案，而審議有關法案委員會開咗15次會議共約34小時討論，都未完成審議。實際上，政府同民主派議員都想快啲通過垃圾徵費，但因為影響業界，商界想拖得就拖，而建制派亦礙於市民反對聲音較大，唔想失去支持，亦唔想喺呢屆立法會通過，依家泛民總辭，商界同建制派自然可以拖得就拖喇！