政Whats噏：西貢區議員被批開會唔戴口罩　憂爆「區議會群組」

新冠肺炎疫情持續，近日更出現群組爆發，例如酒店Staycation等，有區議員就擔心會引發「區議會群組」。話說西貢區議員方國珊(哪吒)今日(17日)上載該區區議會房屋及規劃發展委員會會議相片，仲喺貼文不點名批評有個別議員屢經勸喻，都成日唔戴口罩，好驚會引發「區議會群組」。

哪吒接受查詢時話，嗰位議員係維景選區區議員葉子祈，又話委員會主席梁里同其他委員都試過喺會上提醒葉子祈要戴番口罩，但係葉子祈嘅態度就嬉皮笑臉。哪吒認為葉子祈防疫意識欠奉，對議會同市民唔夠尊重。

梁里證實事件，又話曾多次向葉子祈作出勸喻，最終葉亦有戴番口罩。被問到點解開會期間拉低口罩，葉子祈解釋話當時飲緊水。再追問其中一張照片見佢無戴口罩，佢就話無補充。