政Whats噏:郭榮鏗自詡溫和抗爭 實質損害一國兩制

20201121
東網電視
更多新聞短片
有指尋求美國制裁係被DQ嘅主因,但郭榮鏗話無悔咁做。
港府早前取消4名泛民主派立法會議員資格(DQ),已即時喪失議員資格的公民黨(公文袋)郭榮鏗,宣布退出政壇。郭認為議會式政治已經過時,自己喺政圈亦不可能再有發展空間。而佢喺2012年參選時已放棄加拿大護照,因此暫無計劃離開香港生活。郭又形容自己一向溫和,之但係佢多番涉嫌勾結外國勢力,甚至去信尋求美國制裁中港,又喺去年主持立法會內務委員會主席選舉時,足足拖延大半年,咁睇其實殺傷力分分鐘大過抗爭派!
因應全國人大常委會嘅決定,郭榮鏗即時喪失議員資格,佢日前接受專訪時就指,早於7月30日被選舉主任取消參選資格嗰陣,已經決定唔再參與任何選舉。郭亦話,議會式政治已經過時,應該交畀年輕人決定未來走向,佢唔會考慮從事地區工作,話「唔係佢杯茶」。顧及到自己喺政圈再無發展空間,郭就選擇瀟灑啲,喺呢一刻退出政壇相信係一件好事,但遺憾令屋企人承受甚大壓力咁話喎。
有指郭早前尋求美國制裁係被DQ嘅主因,佢仍然死不悔改,話無悔咁做,仲話「人生如棋,落子無悔」。郭仲形容自己一向溫和,希望可以理性、務實咁落實一國兩制。但事實上佢一直劣迹斑斑,實質係損害一國兩制!佢過去曾多次去美國「告洋狀」,例如2018年獲美國眾議院民主黨領導佩洛西於美國國會山接見;去年初本港醞釀反修例風波期間,郭亦應美國國家安全委員會邀請,赴美反映有立法會參選人被DQ嘅事,以及就著港府修訂《逃犯條例》等事宜,借美國向港府施壓等,甚至去信要求美國制裁中港。
不但如此,郭榮鏗去年利用內會副主席身份,不斷阻撓主席選舉,令內會停擺7個多月,造成大量法案同附屬法例積壓,癱瘓議會運作。港澳辦同中聯辦更多次發聲明,點名批評郭「政治攬炒」,阻撓內會選主席同涉嫌公職人員行為失當。相比其他抗爭手法,例如有議員衝出主席台抗議、喺位上大聲喧嘩、又或者喺街頭抗爭,似乎郭嘅威力一啲都唔嘢小,殺傷力十足喎。
郭榮鏗自2012年起擔任法律界議員,曾經擔任市區重建局非執行董事、競爭事務委員會委員等公職。喺特首林鄭月娥上任初期,更加曾經接納郭就空置稅嘅建議。不過今時唔同往日喇,因應特首提請中央取消議員資格,郭短短8年嘅政治生涯亦就此結束。不過到結束呢一日,仍然唔覺得自己做錯,先係最大嘅錯。