政Whats噏:運房局遭鬧爆後縮沙 重新考慮打鼓嶺過渡房屋項目

2020年11月22日 20:22
東網電視
更多新聞短片
運房局有意喺打鼓嶺發展過渡性房屋,但因事前冇諮詢相關人士而捱轟。
香港房屋土地供不應求,覓地起屋自然係重中之重。之不過,政府有意喺打鼓嶺發展過渡性房屋,但運輸及房屋局事前又冇諮詢相關人士,搞到最後喺北區區議會、地區人士、鄉事委員會嘅三方批評之下暫時擱置,局方話再研究後會諮詢上述三方,有共識後先再重推項目喇。
區議會率先轟炸運房局,北區區議會土地發展、房屋及工程委員會早前召開會議,討論有關將打鼓嶺坪輋路昇平學校發展為過渡性房屋嘅事宜,話無論喺選址抑或周邊設施方面,都有好多問題尚未解決。而局方捱轟後,就將發展過渡性房屋「回爐重造」,承諾會繼續諮詢打鼓嶺區鄉事委員會、北區區議會同埋相關持份者,達致一個共識方案先至向城市規劃委員會申請規劃許可,同埋再推展過渡性房屋。
北區區議會主席羅庭德就話,局方嘅回應好空洞、冇具體細節,會議上有區議員話發展過渡性房屋嘅選址有問題,建議局方另覓地點,不如發展河套區或者選擇上水嘅農地,但局方就淨係話「考慮吓」、「諗諗先」。佢又批評局方話如果喺打鼓嶺發展過渡性房屋,就會同運輸署商量喺附近地區加設巴士、小巴等班次,但都係冇具體時間表,認為最終得到落實嘅可能性不大。
唔單止區議會狂轟運房局,就連鄉議局都鬧爆局方。運房局局長陳帆最近出席新界鄉議局會議,據聞會上唔少委員都質疑打鼓嶺發展過渡性房屋選址錯誤。打鼓嶺鄉事委員會主席陳月明就話方案根本冇事前諮詢持份者,希望局方重新考慮選址,但陳帆就冇提供其他選址,只係一味話會「保持溝通」。陳月明又話,選址附近嘅配套設施十分落後,就業、就學嘅場所都冇,就連附近嘅道路都好殘舊,唔明白喺該地段發展過渡性房屋有乜嘢意義。佢希望陳帆親身落地視察,解決一系列嘅問題,而唔係就咁話「溝通」。
其實發展過渡性房屋本身係好事,一來可以地盡其用,二來又唔會影響地區嘅長遠發展。之不過,發展計劃前係咪應該先知會各持份者,而唔係「硬闖」呢?依家畀公眾嘅印象就好似局方一意孤行,但捱轟後又「縮沙」唔做囉!