政Whats噏：李文浩揀客涉歧視　民政處拒發10個月議辦租金津貼

深水埗區議員李文浩同劉家衡早前喺聯合辦事處張貼「藍絲與狗不得內進」嘅告示，其後再升級為「藍絲暴徒不得內進」。李文浩話民政事務處並無向佢發放1月至今嘅辦事處租金津貼，需要自行墊支約30萬港元營運開支，但揚言自己唔等呢筆錢開飯喎！

李文浩表示區議會秘書處不斷要求佢作聲明，解釋辦事處用途，佢4次回信列出辦事處會借畀街坊、長者等開會，但秘書處唔接納回覆，要求佢清楚列明有關組織。李文浩批評民政處視佢係深水埗區議員中最有威脅嘅一個，而有心留難佢。

李文浩話當時仲同秘書處講，「有本事就4年都唔好畀筆錢」，仲話唔會再同秘書處糾纏，自己又唔係等嗰幾十萬開飯，對佢並唔構成壓力，有能力繼續墊支咁話喎。

李文浩張貼嘅「藍絲與狗不得內進」告示引起民憤，早前遭到各界狠批，更加被人上門聲討，一度爆發肢體推撞，李話至今仍收到大量嘅「死亡恐嚇」。

東網向民政事務總署作出查詢，署方指區議會秘書處會按《酬津指引》，仔細審批發還款項申請，會要求區議員作出所需嘅澄清，以確保有關開支喺用於執行區議會職務。對於李文浩張貼嘅告示，署方已經轉介投訴畀深水埗區議會主席跟進，並希望區議會可以秉公處理，同時提醒區議員應該確保行為唔會令區議會信譽受損。