政Whats噏:有傳立會清潔工涉「跳舞群組」 秘書處證實並無染疫

20201124
東網電視
更多新聞短片
立法會清潔工疑涉「跳舞群組」,唔通會影響特首聽日發表施政報告嘅安排?
新冠疫情持續爆發,而立法會都被殃及,有傳一名立法會清潔工人同「跳舞群組」有關,正接受強制隔離。但係聽日(25日)就係特首林鄭月娥去立法會宣讀施政報告嘅日子,唔通又要轉為視像形式又或者再度延遲?
消息話,有一位喺立法會大樓二樓工作嘅清潔工人,同累積有逾百人染疫嘅「跳舞群組」有關。立法會秘書處話收到清潔承辦商通知,該名清潔工人曾經同一位確診者接觸,已被列為「緊密接觸者」,而病毒檢測結果係陰性,接受緊14日嘅強制隔離,但未有透露係咪涉及「跳舞群組」。
秘書處話有另外兩位清潔工要共用休息室,亦已經進行病毒檢測,結果同樣係陰性。秘書處表示已經為大樓嘅公用地方同設施加強消毒。
上年特首去立法會宣讀施政報告,因為泛民主派進行抗議,而臨時改為用視像形式公布。而今年嘅施政報告原本喺上個月公布,但特首話要同中央商討更多惠港措施,而要押後至聽日宣布,唔知佢會唔會被嚇怕,而要再度改期呢?