政Whats噏：鼠患處處　港府技窮重提試用熱能探測機

政府滅鼠不力，一直為人詬病。政府今次嘅施政報告就舊事重提，指有關部門會試用配有人工智能技術嘅熱能探測攝錄機，監察以及分析鼠隻活動，以量化鼠患情況，再進行針對性嘅滅鼠工作咁話喎。立法會食物安全及環境衞生事務委員會主席、漁農界議員何俊賢(高佬賢)話監察鼠隻活動只係第一步，如果欠缺進一步嘅治鼠措施，市民絕對唔會收貨，同時亦批評政府滅鼠工作落後，要徹底改革先可以根治鼠患。

政府消息人士表示，有關技術會同專才合作，儀器價錢需要再諮詢食環署。政府講到採用熱能探測攝錄機好似新事物咁，但其實食環署署長劉利群舊年回應議員嘅質詢，就提到委聘科技公司使用熱能探測鏡頭配以人工智能系統，以進行監察鼠患情況。儘管己提交報告研究畀立法會，但相關技術直至今個月起先推擴至各個目標滅鼠小區，而量化同試用時間仍然進行中，希望可以有目標咁放置鼠餌，解決鼠患問題。

高佬賢直言相關部門係想攞政績，但使用相關儀器並唔係新鮮事，呢種方法聽落就好似好高科技，但係咪可以解決問題就值得質疑。高佬賢認為就算監察完鼠隻活動，發現老鼠數目就好似全港700幾萬人口一樣咁密集都無用，都要搵到個老鼠竇先得。若然只係停留喺第一步就萬萬不可接受，重點在於點樣進行滅鼠工作啊。

有指政府眼見街市鼠患問題嚴重，近月起已經進行密集式滅鼠行動，每日喺街市閂門後都會進行大清洗，尤其係清洗污渠。之不過高佬賢批評食環署滅鼠手段落後，忽略老鼠好聰明同埋大把嘢食，仍然沿用番薯、叉燒等作為鼠餌恐怕收效甚微。高佬賢仲話啲老鼠已經識得爬上廿幾層樓入埋屋，政府應該諗下辦法點樣喺私人地方滅鼠。

議員陳恒鑌(Ben)亦批評食環署滅鼠，來來去去都離唔開幾道板斧，主要都係用鼠籠同鼠餌，促請署方應該開放思維，借鑑其他地方嘅治鼠經驗，以及邀請科研界提供更多創新嘅滅鼠方法。Ben又話依家要應付新冠肺炎已經好頭痕，如果爆發埋大鼠戊型肝炎就不堪設想啦。