政Whats噏:行會成員轟政府部門等運到 羅致光被斥「唔係好幫得手」

2020年11月26日 11:54
東網電視
更多新聞短片
葉劉淑儀趁特首出席答問大會,炮轟政府官員嘅表現。
新一份《施政報告》昨日(25日)出爐,行政會議非官守成員召集人陳智思都要循例代表一班成員發言,話非常認同及支持呢份《報告》。之不過有兩位身兼行政會議成員嘅議員,今日(26日)趁特首林鄭月娥去立法會接受質詢時,連番炮轟政府官員嘅表現。其中曾任保安局局長嘅議員葉劉淑儀,就點名批評勞工及福利局局長羅致光喺處理外傭問題時「唔係好幫得手」。而林健鋒更斥責政府部門「唔進取」、「等運到」。
葉劉淑儀喺答問大會上指出,印尼及菲律賓呢兩個國家嘅政府有新政策,就係外傭嘅培訓費用需由僱主承擔,所以近來唔少中產市民都大吐苦水,話若果外傭頻繁離職,又或需轉聘另一位外傭,有關費用會令佢哋百上加斤。葉劉淑儀又話林鄭可能無僱用外傭嘅需要,所以並冇留意呢個困擾中產嘅問題,不過就點名指摘羅致光「唔係好幫得手」,希望政府可以「出力」,令僱主可以繳交少啲費用咁話。
林鄭月娥回應話,會請羅致光認真檢視有關嘅支援安排。佢又指呢個係平衡問題,喺疫情下大量外傭難以來港,故本地外傭轉換工作時都要小心,需要佢哋先進行病毒檢測先可以開始工作。
林健鋒就批評政府部門「唔進取」、「等運到」,質問林鄭點樣可以更緊密咁聯繫各個部門,令所有政策可以盡快實行。林鄭就回應話應該要靠制度,而唔能夠靠人,部門需要由高層督導,唔可以將事情「推來推去」,又指房屋、土地及旅遊等問題都係由佢親自督導。
林鄭又以尋日起生效嘅撤銷工商舖辣招稅為例,指需要經過修訂《印花稅條例》先可以生效,若然議會並非如現時般理性,佢亦可能唔會即時做到,達致急市民所急,又話過去有部分良好政策之所以唔能夠完成,皆因有人唔願配合,如今有決心會理性、務實咁施政。