政Whats噏：創科不敵通識　薛永恒冷板櫈坐足半粒鐘

新一份施政報告尋日(25日)公布後，各個政策局今日(26日)陸續召開政策記者會，解釋細節。話說喺教育局同創新及科技局嘅記者會上，傳媒都好關注教育問題，不停咁問教育局局長楊潤雄問題，搞到創科局局長薛永恒被冷落，要自己衝出嚟請傳媒問佢問題呀！

喺記者會上，傳媒都主力問楊潤雄問題，例如通識教育嘅改革。問完一條接一條，終於喺楊潤雄答完其中一條問題後，薛忍唔住啦！佢拎起咪講，指市民其實對創科都好關注，創新科技對社會發展都好重要嘅，呼籲在場記者問佢問題。聽到呢句，楊潤雄仲笑咗一聲添！原來薛永恒喺講完開場白之後，已經安靜咁坐咗半個鐘「冷板櫈」，無人問過佢問題。

喺薛永恒硬銷自己後，在場嘅新聞官隨即邀請記者問下薛永恒問題，咁又有2位記者發問，但問完之後，跟住啲問題又返去教育方面，薛永恒都只好繼續默默咁坐喺度喇！