政Whats噏：陳家駒棄保潛逃英國　眾籌撲水繳付簽證相關開支

主張香港獨立、涉嫌觸犯《港區國安法》而遭警方通緝嘅陳家駒，本港時間今日(27日)凌晨喺Facebook發貼文，透露自己自今年6月初已棄保潛逃至英國領土。之不過，佢喺貼文中話自己嘅旅遊簽證即將到期，又形容自己冇錢支付「Leave Outside the Rules（LOTR）」嘅相關申請開支，所以就發起眾籌撲水。

陳家駒早前被控舊年6月10日喺灣仔參與非法集結，保釋期間每星期都要到警署報到，但佢喺今年6月、即《港區國安法》實施前棄保潛逃。佢今日喺貼文透露，自己早喺6月初已「流亡至英國領土」，期間一直靠積蓄同朋友幫忙支付日常開支。

佢又提到，自己所持嘅旅遊簽證將於下月5日到期，但就無力繳付LOTR所需嘅費用，所以發起眾籌撲水。佢話，依家喺英國提出申請，需要支付醫療費用同申請費合共2500英鎊，即折合約2.6萬港元。之不過，佢發起嘅眾籌目標金額高達4.5萬英鎊，即折合約46.7萬港元。