政Whats噏:港台亂局 陳建強斥梁家榮實行約章有嚴重落差

20201130
東網電視
更多新聞短片
陳建強鬧爆梁家榮實行港台約章有嚴重落差。
年花10億港元公帑嘅香港電台經常被批評節目立場偏頗,廣播處長梁家榮嘅表現劣評如潮,外界一直有聲音叫政府將佢炒魷。自稱「約章陳」嘅港台顧問委員會前主席陳建強日前就鬧爆,梁家榮喺實行港台約章上有嚴重落差,又批評佢唔肯面對公眾。梁家榮任期於明年約滿,雖然唔打算續約,但都唔代表可以懶懶閒喎。
約章陳早排先卸任主席1職,日前出席議員葛珮帆(EQ)嘅網台節目時,提到顧委會嘅工作係支持廣播處長做好港台約章嘅公共使命,向廣播處長提交意見,唔係處理投訴個案。對於梁家榮嘅表現,陳建強就直斥梁喺落實約章方面有嚴重落差,仲提到喺上年9月至11月中,唔少節目都犯下同一錯誤,質疑梁係咪有疏忽。
唔單止咁,約章陳仲批評梁家榮唔肯面對公眾,好多時都係由港台機構傳訊組總監伍曼儀面對。佢話以前曾經向梁家榮反映,但梁家榮就回覆話作為傳媒應該要低調,唔係每次開會都要邀請傳媒。約章陳坦言,對梁家榮嘅說法不敢苟同,同埋覺得好保留,又話社會上唔同嘅聲音,即使有反對聲音都唔可以對沖。
一向關注港台事務嘅EQ就話港台作為公營機構,市民係期待節目係有質素同埋持平,唔係偏幫,仲鬧爆港台依家係「無王管」。過往佢都有喺立法會上向梁家榮提出質詢,話收到唔少關於港台節目嘅投訴,但梁就話讚賞節目嘅數量比投訴多,所以唔使處理投訴。佢仲質疑梁家榮嘅工作,認為梁若未能管理,政府應開除梁。
EQ仲直斥梁家榮「離晒大譜」,話作為公營機構應擁護《基本法》,唔係喺節目中宣揚港獨。佢認為即使顧委會已向梁家榮提供意見,但梁就借咗「聾耳陳隻耳」,唔聽意見同時亦冇採取行動,喺港台節目《鏗鏘集》女編導蔡玉玲被捕一事上只係識盲撐。約章陳都認同,仲話梁家榮作為總編輯,應要對每個節目負責,質疑佢有冇就員工索取資料作訪問一事訂下準則、翻看節目等。