政Whats噏﹕徐英偉再度發炮　呼籲區議員唔好太「人治」同「揀擇」

現時17區區議會由泛民主派主導，同政府嘅關係一直好緊張。民政事務局局長徐英偉今日(3日)出席電台節目時指，好多區議會嘅討論事項都屬違規同越權；區議員亦放大個別例子，話以審批撥款方式打壓佢哋，徐英偉直指「我自己報銷都唔可以攞住張單，指住個鼻就話你爭我錢喇」。有民主派區議員就反指政府唔承認區議會選舉結果，有份造成雙方關係緊張嘅局面。

繼前日喺電台節目上發炮之後，徐英偉今日又隔空批評泛民區議員，話佢哋喺好多議題前加上區議會字眼，就當係地區議題，而出席會議嘅民政事務專員同公務員更被侮辱或者「禁錮」，令佢好痛心。有意見指區議會喺2015年可以討論政改方案，都屬於「全港性議題」，質疑政府依家收緊討論空間，徐解釋話當時係政府希望聆聽地區意見，而邀請區議會討論，同區議員主動提出議程係唔同咁話。

身兼18區民主派聯合會議輪任召集人嘅西貢區議會主席鍾錦麟(Ben)，不禁指摘徐係「鬼拍後尾枕」，區議會選舉結果正正顯示市民對政制嘅不滿，但政府偏偏唔尊重結果，又唔承認由泛民當道嘅現象，逢係反對意見都唔想聽，只會繼續加劇現時嘅社會矛盾。Ben又批評政府口講就話區議會應該聚焦地區事務，但同時阻撓區議員跟進地區工作，例如由民政專員主持嘅地區管理委員會，原本容許區議會代表同政府官員深入探討地區事宜，但民政專員近月已經無再召開各區嘅地區管理委員會，更有傳日後唔會再邀請區議會代表參與添，Ben就認為係政府有份造成雙方關係緊張嘅局面喇。

有唔少區議員指政府拖欠款項，徐英偉批評區議員將少數例子放大，聲稱被打壓，例如以撥款進行違規活動、印製違規宣傳品，提交單據時並無提供足夠資料。徐強調，政府一向對於審批撥款嘅程序都好嚴謹，如果款項用得唔妥當或者申報唔清楚，廉政公署可能會介入調查，唔存在對於某類人士會收緊要求，又話連佢自己報銷，都唔係「攞住張單，指住個鼻就話你爭我錢」。

徐英偉話曾經勸喻區議員辦事唔可以太「人治」，可惜情況愈嚟愈差，例如對一啲涉及文化或者長者嘅項目「睇咗個名就唔批」。徐呼籲區議員服務市民時不應「咁揀擇」，要服務所有市民，又話議會有議會嘅規矩、要求同程序，只要跟足《區議會條例》做嘢，就會有好大嘅發揮空間。