政Whats噏：張竹君首度缺席疫情記者會　網民直播留言祝君安好

本港自年初爆發新冠肺炎疫情後，當出現本地確診個案時，政府一般會喺下晝4點半舉行疫情記者會，交代疫情最新發展同新增個案詳情，而過去每次記者會都會見到衞生署衞生防護中心傳染病處主任張竹君嘅身影。之不過，張竹君今日(5日)首次缺席記者會，就惹嚟唔少市民關注。

疫情下，市民最熟悉嘅官員好可能係張竹君，事關每次打開電視收睇疫情記者會時，都會見到張竹君匯報最新情況。佢更曾經試過最少連續72日冇放過假，令到唔少粉絲都好關注佢身體健康，仲會留言「祝君安好」添！

查實早前有消息話張竹君丈夫身體出現問題，所以唔少網民揣測今次缺席係咪同家人有關，更喺政府新聞網嘅Facebook直播中大表祝福。至於今日嘅記者會就首度由傳染病處首席醫生歐家榮主持，或者因為今次係第1次，所以佢明顯較為緊張。