政Whats噏：何君堯斥公務員架構臃腫　促瘦身節流

本港經濟不景，市民亦因而怨聲載道，不過政府依排就話將經常開支將大幅增加至近5000億港元，又話喺經濟下行下需要研究如何開源節流，似乎係做期望管理喎。雖然之前政府決定撤回哂啲開設首長級職位嘅申請，不過議員何君堯就直斥，啲公務員「個個肥到連襪都着唔到」，但就連防疫工作都做唔好，仲建議政府應該改革，要為佢哋「瘦身」。近年公務員備受批評，唔知作為公務員之首、公務員事務局局長聶德權會唔會檢討下呢！

今日(7日)正值立法會財經事務委員會開會，財政司司長陳茂波就本港嘅經濟情況進行簡報，點知佢一上到嚟就被炮轟喇！何君堯喺發言時，就批評現時公務員團隊多達18萬人，直言「個個肥到連襪都着唔到」，但要求政府做好防疫工作又話做唔到，反問「點樣畀5000億你洗啊？」對於要點樣開源節流，何君堯就建議政府應該改革「臃腫」嘅公務員架構，仲叫陳茂波要「要勇敢啲」，聚焦大灣區市場同埋擴闊稅基，否則長貧難顧。

對於有議員喺會上關注政府將2蚊乘車優惠，擴展至60歲或以上長者方面，究竟係點樣計到有關額外經常性開支每年達60億港元，陳茂波回應時就一直兜圈，完全冇答到問題。有見及此，何君堯喺發言時就話香港經濟需要有用嘅人才，可以即時運用資料回應問題，而唔係「次次嚟親有成10幾20條友仔，但到要答問題時就倒瀉籮蟹咁」，似乎佢都睇唔過眼官員嘅表現喇。

對於畀何君堯連番發炮批評，陳茂波回應時稱多謝對方意見同建議，仲話18萬公務員團隊喺唔同崗位上作出努力，亦見到唔少公務員表現出色，會努力做好工作服務市民。

其實公務員嘅表現係咪正如陳茂波所講嘅咁出色呢，市民會自行判斷，相信依家經濟咁差，市民應該比較關心政府肯唔肯幫班公務員「瘦身」，將更多資源用喺市民身上喇！