政Whats噏：籌款活動難再舉　公民黨陷財困

公民黨近日爆發退黨潮，財政方面亦陷困境。有黨內嘅執行委員會成員話，未來需設法開源節流，包括考慮租出黨內部分地方添啊。

公民黨執行委員會成員、油尖旺區議會副主席余德寶話，本身黨內經濟已經面對好大困難，過往主要依賴街頭籌款以及籌款晚宴，但相信未來都會停止有關活動。佢表示，未來會繼續開源節流，包括重整秘書處人手，甚至考慮向外租出黨內部分地方，作工作坊用途咁話。

至於該黨秘書長梁嘉善就話，黨內過去一年遇到非常嚴重嘅打壓，表示每個人都有唔同嘅思想，都理解大家嘅諗法，而未來就會繼續探索唔同嘅可能性，相信地區工作唔會受影響。

公民黨近日先後有4名區議員退黨，包括東區區議員鄭達鴻、葵青區議員冼豪輝、譚家浚以及南區區議員俞竣晞。睇嚟公民黨變成「雙失」，人又無、錢又無，真係前路茫茫喇。