政Whats噏：葉建源遷出立會辦公室　與助理合照留念

民主派議員總辭今個月初生效，近日陸續交還立法會辦公室，教育界前議員葉建源(葉Sir)係其中一位，佢尋日(16日)特意趁住喺立法會最後一日，喺社交平台上載同一班助理嘅合照，一齊告別議會。

葉Sir話，助理極少走到前台，但議員喺前台嘅表現，背後就係佢哋嘅心血，希望大家留意助理，雖然佢哋仍然堅持戴住口罩，保持低調，就好似呢一次離開嘅其他200位議員助理一樣，見證住一段歷史嘅結束。

唔少網友留言話多謝葉Sir同助理一直以嚟嘅貢獻，又話離開並唔代表終結，而係意味住新里程碑將會展開，鼓勵佢哋繼續努力工作。

葉Sir上個月尾話嚟緊可能會代課或者兼職教番書，但係教書都辛苦，所以唔會考慮做全職老師，教咩科都無所謂，仲講笑話唔知有無人肯請佢呢？