政Whats噏：區議員畢東尼滯留英國　指港不應盲從歐洲封鎖政策

九龍灣麗晶花園早前爆疫，但當區區議員畢東尼身處英國探親，被狠批置居民安危於不顧。因應英國出現變種病毒株，港府禁止英國航班抵港，畢東尼滯留當地，化身「當地區議員」，為身處英國嘅港人爭取權益喎。

畢東尼話作為其中一個身處英國嘅港人，更加明白要返香港真係好難，包括要一早預約酒店房間作隔離，上機前要通過病毒檢測、抵港後更加要安排車輛前往酒店。畢東尼話原本已經安排好喺今個月返香港，不過依家機票同酒店房間一同被取消。

歐洲各國都採取類似措施，禁止英國航班抵達，但畢東尼認為香港對海外來港人士嘅防疫措施已經夠嚴謹，唔應該盲從歐洲嘅嚴厲封鎖咁話喎。畢東尼擔心港府要等到開始接種疫苗，先為英國航班解封，已經去信食物及衞生局，要求提供解封準則。睇嚟畢東尼都擔心唔知幾時先可以重回工作崗位，而要畀市民繼續狠批喇。